Friday, 15 June 2018

Roho Yako

289. Roho yako inatoka wapi? Ya kwangu inatoka Tanzania. Kwa sababu amani na utulivu ndivyo vitu vya muhimu zaidi katika maisha yangu.

Kila mtu kabla ya kuzaliwa roho yake iliumbwa na Mwenyezi Mungu na kupangiwa nchi itakapozaliwa na kuishi. Katika nchi hiyo Mungu akatanguliza malaika mwema ambaye kazi yake ni kumsaidia mtu mwenye roho hiyo tangu kuzaliwa kwake hadi kufa kwake hadi baada ya hapo.

Lakini Shetani atakapoinasa roho hiyo, kabla mwenye nayo hajazaliwa, ataibadilisha ili izaliwe sehemu nyingine tofauti na pale alipopanga Mungu; ili imtumikie yeye badala ya kumtumikia Mungu.

Kujua uraia halisi wa roho yako, hivyo kuujua uraia wako, lazima ujitambue; lazima ujue kwa nini ulizaliwa.

Mungu akikuweka mahali unapostahili kuwa, kulingana na takdiri ya maisha yako, hakuna mtu mwenye uwezo wa kushindana na kipaji chako.

Ishi mahali unapostahili kuishi.

Kiburi

288. Kiburi ni kiwango cha juu kabisa cha umimi au ubinafsi, na ni sumu ya mahusiano.

Kuwa na kiasi. Usiwe mjinga sana wala usiwe mjanja sana. Ukiwa mjinga sana utapata matatizo, kwa Mungu na kwa wanadamu, na ukiwa mjanja sana utapata matatizo pia, ambayo ni kiburi, kwa sababu mtu mwenye kiburi hawezi kamwe kuridhika na heshima na unyenyekevu anaoupata kutoka kwa watu.

Watu wenye kiburi ni wabinafsi, watu wanaopenda kuheshimiwa na kunyenyekewa, na wanajiona bora zaidi kuliko wengine, wanaopata taabu sana kuomba msamaha. Kiburi si upendo na upendo si kiburi. Dawa ya kiburi si kiburi kingine. Dawa ya kiburi ni upendo na hekima.

Hata hivyo, kuna tofauti kati ya kutokujiamini na kiburi. Mtu anaweza asijiamini na asiwe na kiburi, na anaweza asijiamini na akawa na kiburi.

Wengine wanasema kiburi ni kizuri, kwamba ili umshinde Shetani lazima uwe na kiburi. Lakini kiburi dhidi ya Shetani unakishinda kwa hekima.

Kibiritingoma

287. Umewahi kutongoza mwanamke akajishauri kukukubali badala ya kujishauri kukukataa? Umewahi kutongoza mwanamume akajishauri kukukataa badala ya kujishauri kukukubali? Ndugu yangu, yashinde majaribu.

Sababu kubwa inayofanya mwanamke au mwanamume ajishauri kumkubali mwanamume au mwanamke badala ya kujishauri kumkataa ni nguvu ya uchumi aliyonayo mwanamume au mwanamke anayetongoza. Kumkataa mtu mwenye nguvu ya uchumi ni vigumu sana hata awe mbaya kiasi gani. Maana nguvu ya uchumi haiangalii sura wala umbile la mtu.

Mwanamke anayejishauri kumkubali mwanamume yeyote mzuri au mwenye pesa, au mbaya na mwenye pesa, au mzuri na mwenye pesa, ni kibiritingoma. Yule anayejishauri kukataa ni muungwana.

Mwanamume anayejishauri kumkataa mwanamke yeyote mzuri au mwenye pesa, au mbaya na mwenye pesa, au mzuri na mwenye pesa, ni muungwana. Yule anayejishauri kukubali ni kibiritingoma.

Kuna tamaa ya ngono na kuna tamaa ya pesa. Mwanamume ana tamaa ya ngono na mwanamke ana tamaa ya pesa, na kinyume chake.

Yashinde majaribu yako, kwani nguvu kubwa ya Shetani imejificha katika mafanikio.

Mwanamume kumtongoza mwanamke au mwanamke kumtongoza mwanamume akakubali au akakataa kirahisi, au vinginevyo, ni jaribu ambalo kila mtu anapaswa kulishinda kwa hekima ya Mungu.

Kiungo cha binadamu kinachofanya watu waongezeke hatukupewa ili tukitumie kwa anasa za ulimwengu huu. Tulipewa kwa ajili ya kuongezeka tukiwa katika taasisi rasmi ya ndoa, kama upendo wa Yesu Kristo na Kanisa, na kwa ajili ya starehe ya macho kama ilivyorekodiwa katika kitabu cha mapenzi cha Biblia kiitwacho Wimbo Ulio Bora.

Mungu alipomuumba Adamu na Hawa amri ya kwanza aliyowapa ni kufanya mapenzi, ili waijaze dunia, wakiwa katika taasisi ya ndoa. Hivyo, mapenzi nje ya taasisi ya ndoa ni dhambi inayostahili aibu.

Kitu Kigumu Kuliko Vyote

286. Kitu kigumu kuliko vyote usikikatie tamaa, hasa kile unachojua kikifanikiwa kitasaidia watu wengi, kwani kuna uwezekano kikawa kizuri na chenye manufaa zaidi kuliko vyote.

Unapokuwa unafukuzia ndoto, njia ya kuifikia ndoto hiyo aghalabu huwa ngumu sana; lakini pale inapotimia, ndoto hiyo huwa kitu kizuri kuliko vyote.

Kama kwako msamaha ni kitu kigumu kuliko vyote ni kizuri kuliko vyote ukiumudu, kwani kigumu kuliko vyote ni kizuri kuliko vyote.

Wachawi Huroga Watu Waliolaaniwa na Mungu

285. Wachawi huroga watu waliolaaniwa na Mungu. Ukijiondoa katika laana ya Mungu maana yake ni kwamba umebarikiwa na Mungu. Hakuna mchawi, yeyote, atakayekuroga ukarogeka.

Kujiondoa katika laana ya Mungu ni kuwa rafiki wa kweli wa msalaba wa Yesu Kristo; na Biblia. Kwani Biblia na msalaba havirogeki. Ukiwa msomaji mzuri wa Biblia utajiepusha na balaa zote za laana ya Mungu; zilizogongomolewa msalabani huko Kalvari, Yesu alipolipa gharama ya maisha yake kutununua kutoka kwa Shetani.

Maisha Mkebe wa Hesabu

284. Maisha ni kama mkebe wa hesabu. Ndani yake kuna talanta saba. Rula hutusaidia kuweka mambo kwenye mstari. Penseli hutusaidia kuwa na malengo katika maisha. Pembetatu hutukumbusha haki na usawa kwa wote. Kipimapembe hutusaidia kujiheshimu na hutusaidia kupata maarifa. Kifutio hutukumbusha kuanza upya pale tunapokuwa tumekosea. Kichongeo hutusaidia kunoa penseli ili tuendelee kuwa na uwezo wa kujiwekea malengo katika maisha. Bikari hutukumbusha kuwa na mipaka katika maisha yetu. Angalia Shetani ameiba talanta gani katika mkebe wa maisha yako, na uirudishe talanta hiyo kwa gharama yoyote ile.

Bikari ikipotea utagombana na watu kila siku, hutakuwa na hekima ya kutenda jambo, kwani hutakuwa na mipaka katika kila jambo utakalolifanya. Kichongeo kikipotea hutafanikiwa katika maisha, kwa sababu hutakuwa na penseli ya kukuwezesha kuweka malengo katika maisha yako. Kifutio kikipotea, ukifanya kosa hutakuwa na uwezo wa kulisahihisha. Kipimapembe kikipotea hutapata maarifa na hutaheshimika.

Pembetatu ikipotea utaandamwa sana na watu wa haki za binadamu na watu wengine wote wanaopenda haki na usawa popote utakapokuwa. Penseli ikipotea hutakuwa na uwezo wa kujiwekea malengo katika maisha yako. Rula ikipotea ujue mambo yako hayatanyooka kamwe. Mkebe mzima ukipotea, hutakuwa na uwezo tena wa kuuona ufalme wa Mungu.

Hivyo, ni jukumu lako kuona ni talanta gani imechukuliwa na Shetani katika mkebe wa maisha yako na uirudishe kabla mlango wa rehema haujafungwa. Kwani mlango wa rehema ukifungwa, huku bado talanta zako hazijarudishwa, roho yako itaandikwa katika daftari la kuzimu na pengine usiokolewe kamwe.

Kufanikiwa Lazima Ushindikane

283. Kufanikiwa lazima ushindikane.

Kufanikiwa lazima umshinde Shetani. Wale waliofanikiwa kupitia nguvu za giza wamemshinda Shetani, kwa sababu Mungu ameruhusu wafanikiwe. Bila Mungu kuruhusu, hakuna atakayefanikiwa.

Wapo watu nomi waliobobea katika mambo ya giza lakini hawajafanikiwa; wamekwenda kwa wachawi na waganga wa jadi dunia nzima; na wapo watu wengi waliobobea katika mambo ya nuru lakini hawajafanikiwa; wamekwenda kwa wachungaji, mapadri na mashehe dunia nzima. Kwa nini? Kwa sababu Mungu hajaruhusu wafanikiwe. Lazima kuna sehemu wanakosea ndiyo maana Mungu hajawafungulia milango ya baraka.

Mungu anaweza kutumia mafanikio ya Shetani kwa faida ya watu wake. Mathalani, jambazi anaweza kujenga kanisa kwa ajili ya watu wa Mungu na Mungu akalibariki na akambariki jambazi, kwa sababu sifa kuu ya Mungu ni upendo. Jambazi anaweza kwenda kuiba akafanikiwa, wakati mchungaji anaweza kwenda kuhubiri akapata matatizo.

Mamafia wa Amerika ya Kusini na Kaskazini wanafanikiwa katika mambo yao, kwa sababu wanasaidia watu waliosahauliwa na serikali zao. Wanatoa upendo kwa Mungu, kwa kutoa upendo kwa wengine, ijapokuwa walifanikiwa kupitia nguvu za giza.

Katika giza lazima ushindikane, na katika nuru lazima ushindikane pia. Katika giza lazima ushindikane dhidi ya hila za Shetani, kwa kuwa mshirikina kwelikweli; na katika nuru lazima ushindikane dhidi ya hila za Shetani, kwa kuwa mlokole kwelikweli.

Kufanikiwa lazima ushindikane ama katika nuru au katika giza. Ukishindikana katika nuru umemshinda Shetani, ukishindikana katika giza umemshinda Shetani, lakini kwa ruhusa ya Mwenyezi Mungu.

Kubarikiwa, hata hivyo, si ishara ya kusamehewa dhambi. Kubarikiwa ni ishara ya kuwasaidia wengine.

Imani ya Wakristo Wengi Haina Macho

282. Imani ya Wakristo wengi haina macho. Wanaamini watu. Wanaamini kile watu wanachokisema, na kukiandika, badala ya kumwamini Mungu. Kumwamini mtu, au kuamini maandishi, badala ya kumwamini Mungu, ni sawa na kuabudu miungu wengine.

Weka akili yako pembeni kwa muda. Usiamini kile mtu anachokwambia, au usiamini kile unachokisoma kwenye vitabu. Lakini yachukue mawazo yao kisha yajaribishe katika mafundisho yako ya kiroho, ambayo tayari unayo, ili ujue kama kweli kile kilichosemwa au kuandikwa kinaleta maana katika maisha yako. Kama kinaleta, uko huru kumwamini Mungu. Lakini kama hakileti, ukimwamini Mungu umemwamini mungu mwingine.

Yesu na waandishi wote wa Biblia waliongea na kuandika kimafumbo, ili Neno la Mungu lijidhihirishe lenyewe kiroho katika mawazo ya mtu. Unaposikia Neno la Mungu kutoka kwa mtu acha lijidhihirishe lenyewe katika mawazo yako, kabla ya kumwamini au kutokumwamini Mungu.

Monday, 11 June 2018

Mungu ni Mkamilifu Milele

281. Mungu ni mkamilifu milele. Anaishi katika ukamilifu wa milele. Hivyo, kabla ya uumbaji, aliishi katika ukamilifu, baada ya uumbaji, ataishi katika ukamilifu.

Ukiichunguza sana hii kauli utajua Mungu ni nani. Mungu ni Muumbaji, aliyekuwepo, aliyepo, na atakayekuwepo.

Hapa duniani kuna watu wawili tu: Mungu na wewe! Wengine wote, vingine vyote, wako au viko kisogoni mwako. Nje ya macho yako kuna Nuru. Nuru hiyo ndiye Mungu. Wengine wote, vingine vyote, ni akisi ya taswira ambazo ziko ndani yako; ambazo unatakiwa kuziona nje ili uone umekosea sehemu gani, na uweze kurekebisha dunia yako ya ndani.

Wale wanasiasa wanaotwambia kila siku kuwa tulete mabadiliko duniani wanajisumbua iwapo hawatatwambia tulete mabadiliko ndani ya dunia zetu za ndani kwanza. Ukibadilisha dunia yako ya ndani, utabadilisha dunia yako ya nje.

Yesu ni Mfalme wa wafalme, kwa sababu baada ya muda fulani atarudisha ufalme kwa Baba yake. Mungu ni Mfalme wa milele asiyeweza kuonekana wala asiyeweza kufa, 1 Timotheo 1:17, na haonekani kwa faida yetu wenyewe.

Kwa nini? Kama Mungu yupo, yuko wapi? Kwa nini asijionyeshe ili nasi tumwone? Kama alituumba, kwa nini hatuonani naye uso kwa uso? Kwani tatizo ni nini? Faida ya yeye kutojionyesha kwetu ni nini?

Mungu hawezi kujionyesha kwetu kwa kuwa asili yetu ya ubinafsi itasababisha mtafaruku na matatizo makubwa dunia nzima. Kila mtu duniani kote atamng’ang’ania, atamtamani sana, na hakuna la maana litakalofanyika. Itakuwa kinyume na kusudi la maisha; na kusudi la maisha ni kuishi naye mbinguni kwa furaha ya milele, na hatutaweza kuishi naye mbinguni iwapo tuliishi naye duniani.

Hewa ipo lakini hatuwezi kuiona wala kuigusa. Hali kadhalika, Mungu yupo lakini hatuwezi kumwona wala kumgusa. Matendo yake makuu kwetu ndiyo yanayofanya tuamini kuwa yupo. Mungu akijionyesha kwetu tutakuwa kama watumwa. Tutakwama ndani ya asili yetu, na hatutaweza kamwe kuwa na upendo.

Mungu aliyeumba mbingu na nchi anaitwa Yehova na anaishi mbinguni juu ya nchi yote (Zaburi 83:18). Mungu anaishi juu zaidi ya sayari zote za ulimwengu wa roho, mahali ambapo muda wa duniani haufanyi kazi, katika kiti chake cha enzi kilichoijaza mbingu nzima.

Mbingu ni mbingu za Bwana, Bali nchi amewapa wanadamu (Zaburi 115:16). Kwa hiyo, sisi tunakaa duniani lakini Mungu anakaa mbinguni ambako ndiko nyumbani kwake.

Kaleb na Yoshua walihitimu madaraja 40 ya ufahamu kufika Kanaani. Kumfikia Mungu unahitaji madaraja 125 ya ufahamu.

Mungu anasema katika Isaya 66:1, “Mbingu ni kiti changu cha enzi, na dunia ni mahali pa kuwekea miguu yangu; mtanijengea nyumba ya namna gani? Na mahali pangu pa kupumzikia ni mahali gani?” Anasema tena katika Matendo ya Mitume 7:49-50, “Mbingu ni kiti changu cha enzi, Na nchi ni pa kuwekea miguu yangu; Ni nyumba gani mtakayonijengea? Asema Bwana, Au ni mahali gani nitakapostarehe?”

Kulingana na mafungu hayo Mungu ni mkubwa wa kupindukia. Kiwiliwili chake kiko mbinguni, miguu yake iko duniani.

Lakini Mungu ni nani hasa? Mungu ni Roho (Yohana 4:24) anayeishi katika ukamilifu wa milele, akiwa peke yake katika mbingu ya kwake mwenyewe, huku malaika na viumbe wengine wote wakiwa chini yake.

Kabla ya uumbaji Yehova alikuwa peke yake mbinguni akiishi katika ukamilifu wa milele. Lakini hilo halikumpendeza hata akaamua kuwa na msaidizi kwa ajili ya kazi maalumu ya uumbaji wa malaika na wa ulimwengu mzima. Mzaliwa wa kwanza wa Yehova (Wakolosai 1:15) anaitwa Yesu Kristo; ambaye Mungu alimuumba kwa mfano wako, ili asaidiane naye kumuumba binadamu kwa mfano wao.

Yesu Kristo anaitwa Mwana wa Pekee kwa sababu hiyo, kwa sababu ya kuwa mzaliwa wa kwanza wa viumbe vyote, na anaitwa Neno kwa sababu yeye ndiye Msemaji Mkuu wa Mungu.

Hivyo, Yohana 1:1 inaposema, “Hapo mwanzo kulikuwako Neno, naye Neno alikuwako kwa Mungu, naye Neno alikuwa Mungu” inamaanisha kuwa Neno ni Yesu Kristo. Yesu Kristo ndiye aliyekuwako hapo mwanzo (kumbuka Mungu hana mwanzo wala mwisho) naye Yesu alikuwako kwa Mungu naye Yesu alikuwa Mungu.

Yesu ni Mungu kwa sababu yeye ndiye mtendaji mkuu wa Mungu (Mithali 8:30). Yeye ndiye aliyemsaidia Yehova katika kazi yote ya uumbaji. Yesu ndiye aliyeumba malaika kwa niaba ya Yehova, na ndiye aliyeumba mbingu na nchi na wanadamu kwa niaba ya Yehova. Kwa sababu hiyo Yesu akapewa sifa ya uungu, naye akawa Mungu kwa sababu hiyo. Kwa hiyo, kuna Mungu na kuna Yehova.

Yehova ni Mungu kwa sababu ana uwezo wa kuumba. Yesu ni Mungu kwa sababu amepewa uwezo wa kuumba na Yehova.

Ndiyo maana sijawahi kusikia Biblia ikimtaja Yesu kama Yehova. Inamtaja Yesu kama Mungu. Kwa sababu Yesu hawezi kuwa Yehova. Hivyo, wale wanaosema Yesu si Mungu wako sahihi ikiwa wanamaanisha kuwa Yesu si Yehova. Lakini kama hawamaanishi kuwa Yesu si Yehova, Yesu ni Mungu.

Mungu alivyoumba ulimwengu miaka bilioni 14 iliyopita kwa mujibu wa sayansi ya roho ya Kiyahudi, sayansi ya uminyaji, jambo la ajabu sana lilitokea. Mungu ni mkamilifu wa milele na anaishi katika ukamilifu wa milele. Kutokana na umilele huo Mungu alitengeneza mwisho. Aliuminya umilele kwa nguvu kubwa ya ajabu, umilele ukagawanyika na kutengeneza mwanzo na mwisho, katika tukio linalojulikana kisayansi kama Big Bang, na kitendo hicho kikamficha Mungu hadi leo hii.

Ni jukumu letu kama wanadamu kumtafuta Mungu popote pale alipo, kupitia ushirikiano wa myoyo yetu, ili tutengeneze nguvu inaitwa Arvut, itakayoitengeneza na kuirejesha upya roho ya Adamu, itakayotuwezesha kumwona Mungu na kuishi naye milele hata milele.

Ukimjua Mungu utapata Arvut. Kutokana na Arvut kila hitaji lako litajibiwa kwa kadiri utakavyoomba. Arvut maana yake ni upendo.

Usikazie macho madhehebu, kazia macho Maandiko.

Monday, 4 June 2018

Tumejaa Ulaghai, Unafiki, na Utata

280. Mamilioni ya watu wamechepuka katika mahusiano yao. Wengine wameua na imebaki kuwa siri yao. Wengi wanakwepa kodi ya serikali na hawakamatwi. Lakini hatuwezi kumdanganya Mungu. Kwa sababu anatujua hadi ndani ya mioyo yetu.

Mioyo yetu wenyewe hutudanganya kidogokidogo katika kutenda dhambi, wakati mwingine bila sisi wenyewe kujua. Lakini, iamini Biblia, Mungu hawezi kuichukulia dhambi kirahisirahisi! Kwa sababu anaupenda sana uumbaji wake.

Kuna kitu kibaya sana ndani ya mtu. Hilo liko wazi. Biblia inasema chanzo cha matatizo ya mtu ni moyo wake, roho yake, pamoja na uwezo wake wa kufikiri. Tumejaa ulaghai, unafiki na utata. Tunajichezea sisi wenyewe ule mchezo wa kitoto wa kombolela. Yaani, tunajificha na kujitafuta wenyewe, tunawadanganya watu lakini Mungu anatuona.

Labda ni katika mazingira hayo ambapo moyo hufanya kazi yake kwa uharibifu zaidi. Huficha uovu mkubwa wa dhambi unaoendelea kuwa mkubwa, na matokeo yake kuwa mabaya na mazito zaidi. Moyo unatulaghai katika kufikiri kuwa si mbaya, au kwamba Mungu ni mwenye huruma sana kiasi kwamba atapuuza.

Tusipoacha kutenda dhambi, dhambi haitakomeshwa. Ni wajibu wa kila mmoja wetu kukomesha dhambi katika maisha yake. Usisubiri wengine waikomeshe kabla au kwa niaba yako. Hata serikali haitaweza kukusaidia.

Kuna namna moja tu ya kukomesha dhambi, nayo ni kufunga milango yote ya dhambi baada ya kumkaribisha Mungu katika maisha yako.

Funga milango yako yote ya dhambi na kaa mbali na nyavu zinazowinda watu kabla miguu yako haijanaswa na nyavu hizo.

Monday, 28 May 2018

Asili na Fasili

279. Mtu aliyepoteza kila kitu katika maisha yake hana asili wala fasili. Kuwa makini naye. Ana uwezo wa kufanya chochote.

Mtu asiyekuwa na asili wala fasili ni yule asiyekuwa na wazazi wala watoto wala chochote kile katika maisha yake. Si wa kuchezea.

Ujinga ni kutoijua karama yako. Laiti mtu angeijua karama yake angekuwa na kila kitu katika maisha yake.

Ukiijua karama yako utajua kuwa kifo si adui aliyeshindikana, hivyo hakitakusumbua, na utaishi kulingana na kadari ya maisha yako, ukiwa na kila kitu katika maisha.

Kuwa makini na mtu aliyepoteza kila kitu katika maisha yake. Kwa vile hana kitu cha kupoteza, hataona shida kukupoteza.

Monday, 21 May 2018

Adui Tunayepambana Naye ni Profesa wa Saikolojia

278. Mbinguni, Shetani alikuwa kiongozi wa kwaya. Duniani, anatumia muziki kuteka dunia.

Shetani alikuwa mtaalamu wa muziki huko mbinguni. Hakuna aliyekuwa akiimba kama yeye. Huku duniani anatumia utaalamu huo kuteka dunia nzima. Anatumia muziki wa kidunia na muziki wa injili, kusudi binadamu asiende mbinguni.

Mwimbaji anaweza kuwa na nia njema kabisa na muziki wake; lakini Shetani akautumia muziki huo kwa siri, hata kama ni muziki wa injili, kusambaza dhambi ulimwenguni kote.

Si rahisi kumshinda Shetani. Kumbuka, amekuwepo hapa kwa zaidi ya miaka 6000. Sisi hata miaka 300 hatujafikisha. Yaani, hakuna mtu mwenye umri wa miaka 300 hapa duniani leo. Anatujua kiasi gani? Anatujua sana.

Kuwa makini na muziki wa kidunia. Kuwa makini na muziki wa injili. Adui tunayepambana naye ni profesa wa saikolojia.

Monday, 14 May 2018

Makusudi

277. Watanzania wengi wanafanya makusudi angalau wapate chochote.

Usifanye makosa kwa makusudi kuvifurahisha vizazi vya leo na kulishibisha tumbo lako na matumbo ya familia yako. Ukifanya hivyo, vizazi vya leo na vya kesho vyenye akili vitakucheka.

Kwani ukifanya kosa kwa makusudi wapo watu watakaogundua kuwa umefanya kosa, na hao watu watakudharau, iwapo watagundua kuwa umefanya kosa kwa makusudi, hata kama hiyo dharau hawatakuonyesha hadharani. Lakini, hilo kosa, baadaye, litafanya udharaulike waziwazi wewe na familia yako.

Hata kama watu hawaonekani kuziona juhudi zako, fanya kazi kwa bidii na maarifa, kwani, kwa taarifa yako, wanaziona.

Monday, 7 May 2018

Nuru ni Ukweli wa Kiroho

276. Musa asingekufa wana wa Israeli wasingefika Kanaani. Kwa sababu alikuwa tayari kwenda kuzimu ili wenzake waende mbinguni. Musa alikuwa katika nuru. Alimwasi Mungu katika maji ya Meriba, lakini maji yalitoka. Alikubali kumkosea Mungu kusudi wenzake wabarikiwe, na kweli wakabarikiwa. Nuru ni ukweli wa kiroho. Ukiwa katika nuru miujiza itatokea. Jisikie raha kuumia kwa ajili ya matatizo ya watu. Vaa viatu vya yule anayeumia, ili ujue anaumia kiasi gani, kisha msaidie kwa kadiri ya uwezo wako wote.

Sisi wote tunao uwezo wa kufanya miujiza na kweli ikatokea. Kama mtu anaumwa, tunao uwezo wa kusema apone na kweli akapona. Lakini lazima tuwe tayari kuumia kwa ajili ya hao tunaowaombea miujiza, na hao tunaowaombea miujiza lazima waamini kama kweli tunao uwezo wa kuwaombea miujiza hiyo.

Mtu anapoumwa, hata kama si ndugu yako, unaumia kiasi gani kumwona anaumwa? Uko tayari kujitolea kiasi gani kuhakikisha anapona na kurudia hali yake ya kawaida? Kwa nini leo wale wanaofanya miujiza hata kwa kutamka tu jambo likawa ni wachache sana kuliko wale wa kipindi cha akina Ibrahimu, Musa au Yesu? Kwa sababu leo hatuko tayari kujitolea maisha yetu kwa ajili ya watu wengine kupata miujiza.

Miriamu dada yake Musa na Haruni alipofariki huko Kadeshi katika mwezi wa kwanza wa mwaka wa arobaini wana wa Israeli walikosa maji. Miriamu ndiye aliyekuwa baraka ya maji ya wana wa Israeli jangwani, kwani Mungu aliwapa neema ya kisima cha maji popote pale walipopita kwa sababu ya Miriamu. Miriamu alipofariki, baraka hiyo ilifikia kitembo. Hivyo wana wa Israeli wakajikuta hawana maji.

Kwa nini Musa alikaidi agizo la Mungu? Kwa sababu alikuwa na huzuni kubwa juu ya kifo cha dada yake mpendwa na juu ya malalamiko ya wana wa Israeli kuhusu maji na mambo mengine. Kumbuka Miriamu alikuwa na mchango mkubwa sana katika maisha ya Musa. Farao alipotoa amri ya kuua watoto wote wa kiume wa wana wa Israeli, baba yao Amramu alimtaliki mama yao Yokebedi. Mimba ya Musa ilikuwa bado haijatungwa. Lakini ukatili wa Farao ulipozidi, Amramu alisalimu amri na kuwa mateka wa Farao; kama walivyofanya waume wengine wote wa Kiisraeli katika jamii ya Wamisri.

Nabii Miriamu ndiye aliyerudisha moyo wa Amramu nyuma na kukubali kumwoa tena Yokebedi. Hapo ndipo Musa akazaliwa, na hapo ndipo uhakika wa wokovu wa wana wa Israeli ukathibitika.

Baada ya Musa kuzaliwa, mama yake alipomficha katika magugu ya Mto Nile akiwa mtoto mdogo, Miriamu ndiye aliyemlinda na ndiye aliyemshawishi binti wa Farao amchukue Musa akamlee nyumbani kwao.

Kwa hiyo, Musa alikuwa na wakati mgumu wakati Mungu akimwagiza aongee na mwamba ili maji yatoke huku wana wa Israeli wakilalamika bila kukoma. Alikuwa akiomboleza kifo cha mtu wa muhimu sana katika maisha yake, kilichosababisha akose hata uwezo wa kuwaongoza tena wana wa Israeli.

Wana wa Israeli walipoendelea kulalamika kuhusu maji na mambo mengine, Mungu alimtokea Musa na Haruni katika hema. Alimwambia Musa awakusanye watu kisha aseme na mwamba mbele yao, kwamba maji yangetoka na watu na wanyama wao wote wangekunywa.

Musa na Haruni walipofika kwenye mwamba husika, badala ya kuongea na mwamba kama walivyoagizwa, Musa akaupiga mwamba huo kwa fimbo mara mbili, maji mengi yakatiririka kwa kiasi cha ajabu! Fimbo ile haikuwa kwa ajili ya kupigia mwamba, ilikuwa kwa ajili ya kukusanyia watu.

Lakini Mungu akawakasirikia Musa na Haruni. Kwa nini? Kwa sababu waliasi kinyume cha neno lake pale kwenye maji ya Meriba! Mungu alimwambia Musa aongee na mwamba lakini yeye akaupiga mwamba huo, tena akaupiga fimbo mara mbili. Mungu akamwambia Musa na Haruni akasema, kwa sababu hawakumwamini hawangeweza kufika katika Nchi ya Ahadi.

Ukikisoma vizuri kisa cha Musa na mwamba utaona kuwa Musa na Haruni walifanya kosa kubwa la kizembe. Mungu alisema wafanye hiki lakini wao wakafanya kile. Mungu akawaadhibu, lakini akawapa wana wa Israeli baraka ya maji kama Musa na Haruni walivyoomba.

Mungu alikubaliana na kile ambacho Musa na Haruni walifanya ijapokuwa lilikuwa kosa. Maana maji yalitiririka kutoka kwenye mwamba! Kama Musa na Haruni walikosea kwa nini Mungu aliwapa wana wa Israeli muujiza wa maji? Kwa nini hakuwanyima kwa sababu viongozi wao walikosea? Huwezi kumzawadia mtu aliyekosea. Unamzawadia mtu aliyepatia. Kama Musa alikosea kwa nini maji yalitoka?

Kile alichokifanya Musa na Haruni hakikuwa na makosa machoni pa wanadamu; hakikuwa na makosa machoni pa Mungu pia! Lakini mtu mwenye haki yukoje? Mwenye haki ni yule ambaye siku zote yuko tayari kuumia kwa ajili ya watu wengine. Hata kama tendo analotaka kufanya kuwasaidia wengine litamkasirisha Mungu yuko tayari amkasirishe ili Mungu huyohuyo awabariki wengine.

Sisi wote ndivyo tunavyotakiwa kuwa. Tunatakiwa kuwa na upendo usiokuwa na masharti yoyote; na tunatakiwa kuwa tayari kufa kwa ajili ya maisha ya wenzetu.

Upendo usiokuwa na masharti yoyote una nguvu kubwa kuliko ulimwengu wote. Mathalani, uongo ni kitu kibaya. Dini zote zinakataza uongo. Lakini kama itakubidi kuongopa kuokoa maisha ya mtu, uongo ni kitu kizuri. Kwa sababu hakuna kitu kizuri kama maisha ya mtu.

Musa alipiga jiwe mara mbili kwa sababu kuna baadhi ya wana wa Israeli hawakuamini kama maji yangetoka. Kwa sababu hiyo alikuwa tayari kuangamia ili wenzake wabarikiwe.

Utafanya nini kuwasaidia watu wengine hata kama ni kwa gharama ya maisha yako? Utakuwa tayari kufa ili wengine waishi; kama itakubidi hata kuacha kazi yako ili mtu apone acha na atapona kwa ruhusa ya Mungu.

1 Yohana 2:10 inasema, “Yeye ampendaye ndugu yake, akaa katika nuru, wala ndani yake hamna kikwazo.”

Jisikie raha kuumia kwa ajili ya matatizo ya wengine. Vaa viatu vya yule anayeumwa ili ujue anaumwa kiasi gani, kisha msaidie kwa kadiri utakavyoweza. Kama hana damu au figo zake zimefeli, uwe tayari kutoa damu au figo kumsaidia. Ukifika kwenye ngazi hiyo ya upendo, ukiomba muujiza ili mgonjwa apone, anaweza kupona. Si kuomba muujiza ilhali wewe ni mnafiki.

Monday, 30 April 2018

Safiri na Wenzako

 275. Kufanikiwa ni mtihani!

Kwa nini Range Rover ina viti zaidi ya vitano? Ili dereva asisafiri peke yake. Ukiona umefanikiwa sana au umeshindwa sana katika maisha, ujue kuna kitu Mungu anataka kutoka kwako kwa ajili ya wengine.

Mungu anataka tusaidiane na tushukuru kwa kila jambo kwani yeye ndiye aliyetuumba, na anajua kila kitu kuhusu maisha yetu.

Katika barabara ya mafanikio, usisafiri peke yako, safiri na wenzako.

Tajiri anaweza kupita na gari lake katika kituo cha daladala wakati mvua ikinyesha, na akaona si vizuri kuchukua hata watu wawili akawapa lifti, licha ya kuwa gari lake linaweza kuwa na nafasi ya watu sita! Katika dunia hii ambapo dereva na abiria wote wanaweza kuwa hatari, hilo linaweza kuwa jambo lisilowezekana. Lakini kiroho, huo ni ubinafsi na Mungu hapendi.

Wema usizidi uwezo ni falsafa ya kidunia, haina maana. Wema hauozi ni falsafa ya Kimungu, ina maana.

Kufanikiwa katika maisha kuna changamoto zake na kushindwa katika maisha kuna changamoto zake pia. Lakini maskini ana changamoto nyingi kuliko tajiri. Tajiri msaidie maskini na maskini msaidie tajiri.

Monday, 23 April 2018

Wanunulie Watumwa Uhuru Wao Kupitia CAST

274. Kuna watumwa wengi zaidi mwaka 2018, kuliko kipindi kingine chochote kile katika historia ya dunia. Hii inatisha. Wanunulie watumwa uhuru wao kupitia CAST.

Miaka mia hamsini na miwili baada ya marekebisho ya Kifungu cha 13 cha Katiba ya Marekani (mwaka 1865) na miaka 69 baada ya kupitishwa kwa Kifungu cha 4 cha Azimio la Umoja wa Mataifa la Haki za Binadamu (mwaka 1948) kukomesha utumwa na biashara ya utumwa duniani kote, kuna watumwa zaidi kuliko wakati mwingine wowote ule katika historia ya binadamu: utumwa wa kazi, utumwa wa ngono, na utumwa wa vitisho; zaidi ya watumwa milioni 27.

Leo utumwa unazingatia sana faida kubwa na maisha ya bei nafuu. Si juu ya umiliki wa watu kama ilivyokuwa huko nyuma, lakini juu ya kuwatumia kama vifaa duni kwa ajili ya kutengeneza pesa.

Bei ya watumwa leo ni rahisi zaidi kuliko kipindi kingine chochote kile katika historia. Leo mtumwa anauzwa kwa dola 50. Mwaka 1850 mtumwa aliuzwa kwa pesa ya leo dola 40,000. Toa msaada wako wa hali na mali kwa taasisi inayojishughulisha na ukomeshaji wa utumwa na biashara ya utumwa duniani iitwayo CAST na taasisi isiyokuwa ya kiserikali ya Free the Slaves, kukomesha utumwa na biashara ya utumwa duniani kote.

Monday, 16 April 2018

Swali la Tatizo ni Jibu la Tatizo

273. Jibu la tatizo hupatikana baada ya kujua swali la tatizo. Swali la tatizo ni jibu la tatizo. Si jibu la matokeo ya tatizo.

Kama tatizo ni ukame hutapata jibu la tatizo hilo mpaka ujue kwa nini kuna ukame. Inawezekana sababu ni mvua; inawezekana sababu ni migogoro ya ardhi au vita; inawezekana sababu ni ukataji miti ovyo; inawezekana sababu ni ardhi kukosa unyevunyevu kutokana na kupungua kwa vina vya mito; inawezekana sababu ni madhara ya ongezeko la joto duniani. Vyovyote itakavyokuwa, jibu litapatikana baada ya kujua chanzo cha tatizo.

Swali la tatizo ni kama vile, “Kwa nini moyo umepanuka?” Swali hilo linahitaji jibu sahihi. Inawezekana moyo umepanuka kutokana na figo kufeli, hivyo kushindwa kuchuja maji vizuri, na kwa sababu hiyo maji mengi kurudi kwenye moyo, hivyo kusababisha upanuke, kwa kusababishwa na wingi wa maji kwenye moyo. Kwa hiyo, badala ya kutibu moyo ambao ni matokeo ya tatizo, unatibu figo ambacho chanzo.

Swali la tatizo ni swali linaloulizia chanzo cha tatizo, litakaloleteleza ufumbuzi wa kudumu wa tatizo lenyewe.

Kwa hiyo, kwa kifupi: Jibu la tatizo hupatikana baada ya kujua chanzo sahihi cha tatizo, na kulitatua tatizo lenyewe.

Monday, 9 April 2018

SERIKALI HUPENDA WATU ILIYORIDHIKA NAO

272. Serikali hupenda watu iliyoridhika nao.

Mridhishe bosi wako! Kama huna bosi, iridhishe serikali yako.

Monday, 2 April 2018

Mtawala

271. Ukishakuwa mtawala wa kitaifa umeua! Ama kwa kujua au kutokujua! Ama kwa kupenda au kutokupenda!

Taifa ni malaika! Taifa ni Shetani! Laana ya mwenye haki ina haki.

Taifa kama lina haki, mwananchi kama ana haki, laana yake ina haki. Lakini kama taifa halina haki, mwananchi hana haki, vilevile laana yake haitakuwa na haki.

Mtawala wa kitaifa anaweza kufanya maamuzi mazito yanayoweza kuleta madhara makubwa anayoyajua au asiyoyajua.

Wananchi (na watawala) wanapaswa kutumia busara na hekima kuyakubali au kuyakataa maamuzi ya viongozi wao, na wawe na hofu ya Mungu, yawe mema au mabaya.

Vilevile, kila mtu, mtawala au mwananchi wa kawaida, anapaswa kuwa na busara na hekima juu ya maamuzi yake. Maamuzi yoyote yale yanaweza kuwa na madhara makubwa kwa mwananchi au taifa.

Monday, 26 March 2018

Kama Watanzania Wamelaaniwa Wamejilaani Wenyewe

270. Watanzania wana tabia ya kumwomba Mungu badala ya kumshukuru.

Kama Watanzania wamelaaniwa wamejilaani wenyewe. Wana tabia ya kumwomba Mungu lakini hawana tabia ya kumshukuru, baada ya kupata au kukosa.

Roho Yako

289. Roho yako inatoka wapi? Ya kwangu inatoka Tanzania. Kwa sababu amani na utulivu ndivyo vitu vya muhimu zaidi katika maisha yangu. ...