CS-Paris

Tawi la Kolonia Santita nchini Ufaransa na nchi zote za Ulaya ya Magharibi kama Ubelgiji, Austria, Lishenteni, Lasembagi, Monaco na Uholanzi, na baadhi ya nchi za Ulaya ya Kusini kama Hispania, Ureno, Italia, Korasia na Romania, CS-Paris, njama ya kifo cha Mpelelezi wa Tume ya Dunia John Murphy Ambilikile ziliposukwa; chini ya Gaston Pierre Bastarache, ‘The Circuit’, kiongozi mtukutu wa CS-Paris.

Kujenga urafiki na wanasiasa wakati mwingine ni kitu kizuri, wanasaidia kurahisisha mambo. Gaston Pierre Bastarache anaitwa ‘The Circuit’ kwa sababu ya kujuana na wakubwa na kwa sababu hiyo ameiletea Kolonia Santita heshima kubwa miongoni mwa magenge ya madawa ya kulevya duniani kote.

Bastarache ndiye aliyepewa jukumu la kuangusha ndege ya shirika la ndege la Ufaransa, Air France Flight 279 Boeing 747-400, ndege ya Murphy, huko Uholanzi mwaka 1992. Ana umri wa miaka arobaini. Ana mke na mtoto mmoja.

Makao Makuu ya CS-Paris ni St Germain Boulevard, Paris, nyumbani kwa jambazi wa Kolonia Santita aliyeangusha ndege ya Air France 279 kwa bomu la saa Roger Prideaux, karibu na ukingo wa kushoto wa Mto Seine (La Sorbonne, Chuo Kikuu cha Paris) na kanisa kongwe kuliko yote mjini Paris la Saint Germain-des-Pres.

Hapo mipango yote ya kumuua Murphy ilifanyika kwa msaada wa jasusi wa kike aliyekwenda Tanzania kumpeleleza John Murphy lakini akaishia patupu – ‘Delfina Moore’ – na kwa msaada wa vifaa vya kutengenezea mabomu kama vile redio (Toshiba RT-SF 16 ya spika moja), sanduku, vyuma, nyaya, baruti, saa, n.k., vitambulisho na silaha kadha wa kadha za kujiendesha zenyewe.

CS-Paris ina viongozi tisa: Gaston Pierre Bastarache ‘The Circuit’, Raymond Marse, Roger Prideux ‘The Dynamite’, Sebastian Garnier, Bernadette ‘Dirty Bee’ Kirouac Santere, Colette Nageotte, Marie Pessin Payan, Monique Desmarais, na Patricia Boicourt.

Wote hawa ni wanachama hai wa Kolonia Santita, miongoni mwa wanachama hai zaidi ya 450000 duniani kote, waliokula Kiapo cha Swastika nchini Meksiko.