CS-Saldanha

Makao Makuu ya Tawi la Kolonia Santita la Afrika ya Kusini, CS-Saldanha, yaliyopo Saldanha, Cape Town, Afrika Kusini, lenye magenge madogomadogo zaidi ya hamsini katika nchi ishirini na mbili za kusini mwa jangwa la Sahara; yakiwemo Mkombozi na Magomeni Witches ya Tanzania, Afrika Mashariki; yaliyokuwa yakisambaza madawa, kwa niaba ya Kolonia Santita, kuanzia Magomeni mpaka Bujumbura na kuanzia Masaki mpaka Madagaska.

El Tigre ni nani? Anatoka wapi? Lengo lake na magorila wa Kolombia ni nini? Kwa nini anaitwa Chui wa Siberia? Miezi michache baada ya Panthera Tigrisi kutangaza vita na Serikali ya Meksiko na mashirika-pinzani ya Kolonia Santita; ukulima, utengenezaji na usambazaji wa madawa – na ugaidi wa kimadawa wa kimataifa – viliongezeka maradufu duniani kote.

Kukidhi mahitaji ya wateja, na kulinda katiba na kiapo cha tambiko la uanachama wa Kolonia Santita, CS-Saldanha (Tawi la Kolonia Santita Afrika ya Kusini – lenye wajibu wa kusambaza madawa katika nchi 22 za Kusini mwa Afrika – kuanzia Afrika Kusini mpaka Somalia mpaka Kameruni) ikaanzisha magenge kadha wa kadha ya wahuni katika bara la Afrika; Wakombozi (la Masaki) na Magomeni Witches (la Magomeni), ya Dar es Salaam, Tanzania, yakiwemo.

Wakombozi ikapewa jukumu la kuyachunga Makao Makuu ya Kanda ya Afrika ya Kusini ya Kudhibiti Madawa ya kulevya – na kusambaza madawa kuanzia Masaki mpaka Madagaska.

Magomeni Witches (inayoongozwa na Naga Lubuva ‘Bekka’ au ‘Kichogo’) ikapewa jukumu la kusambaza madawa, bunduki na wanawake kuanzia Magomeni mpaka Bujumbura – na kujihusisha na vitisho, ukahaba, shughuli haramu za kibenki na mauaji ya kulipisha, ya kimkataba, kwa niaba ya Kolonia Santita.

Nani anaongoza CS-Saldanha? Nani anaongoza Wakombozi? John Murphy ni nani? Murphy ni jina lake la bandia (kwa sababu za kiusalama, kumbukumbu na kukwepa mashabiki). La kwake halisi ni nani?

El Tigre ni Panthera Tigrisi, na jina lake halisi ni Benson Bennett, Mwamerika Mweusi aliyekuwa kiongozi wa genge la Benson Brothers of Chicago katika miaka ya sabini – kabla hajahamia Meksiko kuwa kiongozi wa Familia, Federación, na Kolonia Santita. Anaitwa Chui wa Siberia kwa sababu ya kufuga chui mkubwa na mwenye nguvu kuliko wote duniani aitwaye Panthera Tigris, anayepatikana nchini Siberia pekee, hivyo yeye kujiita Panthera Tigrisi, kama alama ya ukubwa na nguvu katika tasnia ya madawa ya kulevya.

Lengo lake na magorila wa Kolombia ni ukiritimba wa biashara ya kokeini ya Kolombia.

CS-Saldanha ni kateli inayotawala katika nchi za Afrika ya Kusini, Kati na Mashariki. Iko chini ya Wonga Mpilo Madoda, ‘The Witch’. Madoda ni mwenyeji wa kusini-mashariki mwa Afrika Kusini, lakini sasa anakaa Cape Town ambako anaendesha shughuli zake za kibiashara. Anatokea katika lahaja ya Wapondo ya kabila la Waxhosa. Kwa hiyo, anazungumza Kixhosa kwa matamshi ya Kipondo. Wonga Madoda ana miaka 34. Ana mke na watoto watatu. Ni miongoni mwa majambazi waliokubuhu wa Afrika Kusini.

Kabla ya kujiunga na Kolonia Santita, Wonga Madoda alikuwa jenerali wa Genge la 28 la mjini Cape Town. Kipindi hicho genge lake na magenge mengine kama 26 na 27 yalikuwa yakishirikiana na wafanyabiashara wa madawa ya kulevya kusambaza methamfetamini (‘tik’), ‘dagga’, mandraksi, na madawa mengine ndani na nje ya Cape Town.

Mwaka 1986 Madoda alifungwa miaka tisa jela, katika gereza la usalama wa hali ya juu la Pollsmoor, kwa kosa la kujihusisha na usambazaji wa madawa ya kuleva; lakini akatoroka baada ya miaka miwili, na kuhamia Johannesburg kwa rafiki yake wa siku nyingi na kibaraka wa Kolonia Santita Crispian Edgar.

Badala ya kuendelea na kazi ya usambazaji wa madawa, Wonga alipewa kazi nyingine. Aliajiriwa kama kidae (‘mule’) wa CS-14 na kusafiri Afrika na dunia nzima kwa ajili ya Kolonia Santita.

Edgar alipouwawa huko Johannesburg katika mazingira ya kutatanisha, Wonga alisafiri mpaka nchini Meksiko; alipokula Kiapo cha Swastika – kiapo cha uanachama kamili wa Kolonia Santita – na kurudi Afrika Kusini, kushika hatamu za uongozi wa CS-Saldanha.

Wonga Madoda alikuwa akisifika sana kwa ukatili. Kati ya risasi alizokuwa akitumia, yeye na wenzake, kufanyia ujambazi, risasi zenye tundu kwa mbele zilikuwa mbaya zaidi. Risasi ya namna hiyo inapogonga kitu kama mwili wa mwanadamu hupasuka na hivyo kusababisha majeraha makubwa.

Mpilo Madoda alikuwa akisifika pia kwa mbinu za kukwepana na vyombo vya dola. Pale alipokuwa akishindwa kutumia glovu kushika bunduki yake alikuwa akitumia gundi ya mbao katika viganja vya mikono ili alama za vidole zisionekane katika silaha.

Wonga ana michoro zaidi ya ishirini mwilini kwake. Ni mrefu, mnene, mweusi. Anapenda kufuga ndefu katika kidevu na sharubu juu ya mdomo wake. Katika shavu la kushoto la uso wake ana alama ya kovu la kisu, alichochomwa Pollsmoor mwanzoni mwa kifungo chake, na alijisikia furaha sana kuwa nalo. Wonga ni shabiki sana wa mpira wa miguu, na ni shabiki pia wa muziki.

Mohammed Nafi, Mkurugenzi wa Sekretarieti ya Kanda ya Afrika ya Kusini ya Tume ya Dunia; alikuwa kiongozi wa Kateli ya Wakombozi, iliyokuwa na jukumu la kuyachunga Makao Makuu ya Kanda ya Afrika ya Kusini ya Kudhibiti Madawa ya kulevya – na kusambaza madawa kuanzia Masaki mpaka Madagaska.

Mauaji ya Meksiko yalipotokea huko San Ysidro, Baja California na San Diego, Nafi alionana na Wonga na Kichogo Hoteli ya Embassy (Dar es Salaam) na kupanga mikakati ya kwenda Cape Town kupokea mizigo ya Kolonia Santita – iliyokuwa imepangwa kufika katika Ghuba ya Saldanha baada ya wiki moja.

Mohammed Nafi alikuwa msaliti wa Tume ya Dunia kama alivyokuwa Meja Jenerali Sebastian Alejandro, Kamanda wa Idara ya Polisi ya Tume ya Dunia Kanda ya Amerika ya Kaskazini, kule Mexico City.

Jina halisi la John Murphy ni John Ambilikile.